PAN JEMPENIT TEKEN MEN JEMPENIT
Ada katuturan satua anak makurenan madan Pan Jempenit
teken Men Jempenit. Sedek dina anu luas Pan Jempenit ka pasisi, sasubane neked
di pasisi nepukin lantas anak ngaba lelipi matali lakar kutanga di pasihe. Mara
keto, matakon lantas Pan Jempenit. Beh jero kija nike lakar bakta lelipine? Masaut
anake ngaba lelipi,”Lakar entungang tiang
nika di pasihe”, mara keto munyin anake ngaba lelipi. Masaut Pan Jempenit, “Beh
yan keto tiang ja baang ngidih lelipine”. Nggih... juang ja, suba keto juanga lantas lelipine. Majalan
lantas di pasisi ngawanang, buin nepukin anak ngaba lelipi, buin masih idiha.
Suba kanti liu maan ngidih-idih lelipi matali, luas lantas Pan Jempenit ka
alase.
Gelisin satua neked
lantas di alase wayah. Nepukin lantas ya naga ngredep janggarne, ngomong lantas
nagane. “Ih... Pan Jempenit dadi talinin cucun kaine?” Matur Pan Jempenit, “Inggih
dewa ratu, ten titiang nika nalinin, nika tuni titiang ka pasisi, raris
panggihin titiang anak makta lelipi matali, raris idih titiang. Yan tan titiang
olas ngidih putun idewane sinah kantun matali, entungange ka pasih”. Beh.. Pan
Jempenit, yan keto terusang tresnan ibane elusin jani talin cucun kaine, nen
upahina ja. Matur Pan Jempenit, Napi men titiang icen? apa ja ane demenin iba.
Mara keto, embusina lantas lelipine. Sasubane telah malusan, ngomong lantas
nagane. Ih... iba pan jempenit apa ane demenin iba. Pipis, nyak? Ten. Gong, nyak?
Ten. Keto aturne Pan Jempenit. Yan keto apa ane tunasin iba teken nira? Matur
Pan Jempenit, “Ali-aline sane ring muncuk ikuh i dewane tunas titiang”. Mara
keto bengong nagane, dening ya bes kalonjok ngomong, lantas baange ali-aline
ane diikutne, tur ngomong nagane. Ih... Pan Jempenit asing tapleka teken bungkunge,
sinah dadi mas. Mara keto munyin nagane, tampina lantas bungkunge tur lantas ya
mulih.
Sasubane neked jumah, lantas takonina teken kurenane.
Mimih... bapane mara teke, neked dija sih luase? Masaut Pan Jempenit. Beh..
memene, ileh-ileh gati pajalan awake, ka pasih maan, ka alase masih maan. Suba
ja keto alihange ane muani nasi. Sasubane suud ngalih nasi lantas makeneh-keneh
Pan jempenit. Beh... tegarang ja taplekang bungkunge di sendine. Keto kenehne,
lantas taplekanga bungkungne di sendine, sajaan dadi mas lantas sendine. Suba
keto jemaka lantas mase ambul sendine tur tundena Men Jempenit ka peken meli
kamben, baju muah ane len-lenan. Ka peken lantas Men Jempenit meli panganggo,
aji mase ane ambul sendine. Beh jeg asepel gati baange kamben teken dagange, kanti
ngajangin Men Jempenit. Suba keto nganggo sarwa anyar lantas Pan Jempenit, beh
kendelne dening tumben nganggo anyar, tur malali-lali lantas Pan Jempenit. Di
makirene malali ngomong Pan Jempenit teken kurenane. “Ih... memene da nyen
jemake bungkunge ane pejang awake sig dingdinge”, keto munyin Pan Jempenit.
Kacarita dening makelo Pan Jempenit tusing teka uli malali,
jemaka lantas teken Men Jempenit bungkunge, tur bungkunganga nebuk. Beh asing
tapleka bungkunge makejang dadi mas. Pakronyoh
ketungane muah lune, yan kenken undukne inget lung lantas bungkungne. Ditu
lantas Men Jempenit jejeh gati kenehne, takut lakar welanga ban ane muani. Ditu
lantas Men Jempenit ngencolang ngaba bungkunge ka pande, benahange. Keto masih
di pandene asing tapleka bungkunge nget makejang dadi mas, angob kanti pandene.
Silurina lantas bungkungne Men Jempenit, tur Men Jempenit tusing nawang. \
Gelisin satua
pragat orahanga lantas bungkungne, baange bungkunge mulih lantas Men Jempenit,
tur subane nganteg jumah, pejanga lantas bungkunge di dingdinge. Kacarita Pan Jempenit
teka lantas uli malali, tur jemaka lantas bungkunge, laut taplek-taplekanga di batune,
sing lantas nyak dadi mas batune. Mara keto matolihan lantas ka ketungane, inget
ngronyoh ketungane. Ditu lantas ngomong Pan Jempenit teken kurenane. Beh memene
kengkenang bungkunge, jani dadi tusing nyak mas ane tapleka? Masaut Men
jempenit, “beh.. bapane mara anggon ake nebuk lung lantas. Suba keto pasuang
oke ka pande”.
Mara keto munyin kurenane naen lantas Pan Jempenit, bane
silurine ban pande mase. Ditu lantas Pan Jempenit ngalih i bikul, i meong, i
cicing, tundena ngalihang bungkungne. Tur yan nyidayang bana ngalih bungkungne
sanggupanga lakar otonina, i bikul, i meong, muah i cicing. Nyak lantas i
bikul muah timpalne, suba keto majalan
lantas i bikul, i meong, i cicing, sambilanga mapaitungan, ngomong i bikul. “Ih..
cicing cai juru ngongkong, kai mongpong petine tur di sedek kaine mompong, i
meong apang mamunyi”. Nah, nah. Keto kone timpalne. Suba keto, teked lantas di
umah pande mase, macelep lantas i bikul ajaka i meong. I cicing diwangan
ngantiang sambilanga ngongkong.
Kacarita jani i bikul
kecag-kecig ngalih-ngalihin petine. Tepukina lantas, tur pongponga petine ban i bikul. I meong di sampingne, tepukina
lantas bungkungne Pan Jempenit lantas jemaka. Suba keto, mamesu lantas i bikul
ajaka i meong, tur kaukina i cicing. Dugase ento hujan lantas bales pesan, tur
tukade blabar gede, dening keto keweh lantas kenehne i bikul ngomong lantas
teken timpalne. “Ih... cicing, jani dija ambahin mulih dening tukade blabar”.
Masaut i cicing, “Jalan suba tuuk dogen”. Masaut i bikul lamun keto cai ngaba
bungkunge. Beh bungut awak kene gede pesan. Keto munyine i cicing. Dening keto
i meong lantas tundena ngaba, nyak lantas i meong tur emuna bungkunge suba keto majalan lantas i bikul muah i
cicing nuuk blabar. Carita i meong paling durina. Mara neked asetengahan tukad,
takonina i meong teken i bikul. Ih... meong nu bungkunge? Nu.. mara keto
munyine i meong, ulung lantas bungkunge. Ngomong lantas i meong, “beh bikul
ulung bungkunge. Yan tusing dogen cai nakonin, sing ulung apa bungkunge”. Mara keto
ali-alihina lantas bungkungne, tusing lantas tepukina, krana yehe gede. Suba
keto nongos latas i meong di tengah tukade, sambilanga ngiwas-iwasin bungkunge.
Kacaritayang ada lantas
teka kedis, madan kedis muwun tur bengong di duur batune. Ento lantas sarapa
teken i meong, laut bakatannga. Mara keto
ngomong lantas i kedis muwun, “Ih meong apa salah kaine dadi sarap apa sih
kewehang iba? Masaut i meong “ih iba kedis muwun krana kai nyarap iba dening
kai ngulungang bungkung tusing tepuk ban ngalih. Jani yan iba nyak ja
ngalihang, tusing lakar matiang”. Masaut i kedis muwun, “Nah meong yan keto
nyak kai ngalihang. Yan tusing saja keto
amah ja taluh kaine”. Suba ja ne keto lebina lantas kedise, tur makeber lantas
ngatebenang.
Sasubane neked di teben, tepukin lantas i dadeleg, laut
cotota ban i kedis muwun. Gelu lantas i deleg tur ngomong, “Yeh... iba kedis
muwun dadi iba jeg sahasa nyotot kai, apa sih duh kitayang iba teken kai”.
Masaut lantas i kedis muwun, “Oh kene deleg, krana kai nyotot iba, kai tundena
ngalihang bungkung ban i meong, tur yan kai tuara nyidayang ngalihang bungkungne,
taluh kaine lakar amaha. Yan iba nyidayang ja nulungin kai, iba tusing lakar
matiang”. Masaut deleg, “Yan keto, kai nyak tulung sakewala iba da ngamatiang kai.
Yan kai bobab telahang ja amah panak kaine”. Nah... suba keto alihina lantas bungkunge,
makelo-kelo bakatanga lantas ban i deleg, laut baanga i kedis muwun. Tur i
kedis muun lantas maang i meong. Suba ja ne keto mulih lantas i meong ajaka
timpal-timpalne.
Gelisin satua i
meong neked lantas jumah Pan Jempenite, ngomong Pan Jempenit teken i meong. Beh
teka suba i meong, kenken dadi makelo pesan? Masaut i meong tur tuturanga
tingkah pajalanne. Subane tampine bungkunge teken pan jempenit lantas buin
taplekanga di batune, dadi lantas mas batune. Ditu lantas payu otonina i bikul,
i meong, i cicing, tur sangia gigine. Ngomong Pan Jempenit, “Beh bikul, kengkenang
nyangih gigin caine”. Masaut i bikul, “Gigin tiange ane di arep lanyingang ane
di samping atepang”. Takonina i cicing, gigin tiange sampunang sangiha sakewala
caling tiange lanyingang. Takonina i meong, gigin tiange patuhang buka i cicing
sangih.
Suba keto sangiha lantas, sasubane suud masangih, ngomong
i bikul teken i meong, “Ih meong jalan jani macanda-candaan”. Jalan... keto i
meong. Macanda lantas tur saling cegut. Makelo-kelo kalah lantas i bikul,
ngomong i bikul, “Ih meong da jani awake matianga, yan suba wake ngelah panak,
amah ja panak awake”. Suba keto ngomong i cicing teken i meong. Ih meong, jalan
jani awake macanda. Nyak lantas i meong. Suba keto, lantas macanda i meong
ajaka i cicing. Yan kenken undukne i meong, nget bakat ceguta teken i cicing baongne,
ditu lantas i meong ngomong, “Ih... cicing da jani kai matianga, buin pidan
lamun kai suba ngelah paianak, yan bakat bani banying panak kaine, amah ja”.
Nyak lantas i cicing. Keto pasangketaan i meonge ajaka i cicing muah i bikul.
Tidak ada komentar:
Posting Komentar